Logo
2019 සැප්තැම්බර් මස 22 වැනි ඉරිදා

‘සජිත් එනවා‘ දෙවැනි රැළිය මාතරදී



“සජිත් එනවා” දෙවන ජන රැළිය මාතරදී ලබන සිකුරාදා (23) ලක්‍ෂ සංඛ්‍යාත ජනකායකගේ සහභාගිත්වයෙන් පවත්වන බව විදුලි සංදේශ ඩිජිටල් යටිතල පහසුකම් විදේශ රැකියා හා ක්‍රීඩා අමාත්‍ය හරීන් ප්‍රනාන්දු මහතා ලංකාදීපයට පැවැසීය.
 
එක්සත් ජාතික පක්ෂය ප්‍රමුඛ පෙරමුණේ ජනාධිපතිවරණ අපේක්ෂකයා ලෙස එක්සත් ජාතික පක්‍ෂ නියෝජ්‍ය නායක නිවාස ඉදිකිරීම් හා සංස්කෘතික අමාත්‍ය සජිත් ප්‍රේමදාස මහතා නම් කර ගැනීම සඳහා වන මහජන පෙළගැස්ම වෙනුවෙන් මෙම ජනරැලි  මාලාව සංවිධාන කරන බව අමාත්‍ය හරීන් ප්‍රනාන්දු මහතා සඳහන් කළේය.
 
“සජිත් එනවා” පළමු ජන රැළිය බදුල්ලේදී ඉකුත් 12 වනදා පැවැත්වුනේ අමාත්‍ය හරීන් ප්‍රනාන්දු මහතාගේ සංවිධායකත්වයෙනි. එහි දෙවන ජන රැළිය මුදල් අමාත්‍ය මංගල සමරවීර මහතාගේ ප්‍රධාන සංවිධායකත්වයෙන් මාතරදී පැවැත්වීමට නියමිතය.
 
එක්සත් ජාතික පක්ෂයේ ජනපතිවරණ අපේක්ෂකයා ලෙස සජිත් ප්‍රේමදාස මහතා පත් කරගැනීමේ සටන අනිවාර්යෙන්ම ජයගන්නා බව කී අමාත්‍ය හරින ප්‍රනාන්දු මහතා ඉන් අනතුරුව දැනටමත් රටේ නිර්මාණය වී ඇති ජන රැල්ල අනුව එක්සත් ජාතික පක්‍ෂ ජනාධිපතිවරයෙකු ඉතා පහසුවෙන්ම බිහි කර ගැනීමට හැකියාව තිබෙන බවද සඳහන් කළේය.
 
 ජනතාව ඉල්ලන ජනතාවගේ අපේක්ෂකයා පත් කිරීම පක්ෂයේ වගකීම බව කී අමාත්‍ය හරීන් ප්‍රනාන්දු මහතා යම් හෙයකින් ඒ වගකීම පැහැර හරිනු ලැබුවහොත් එය සමස්ථ රටේ එක්සත් ජාතික පාක්ෂිකයන්ගේ පරාජයක් වනු ඇති බව පැවැසීය.






Helabima. All rights Reserved.

Copyrights protected: All the content on this website is copyright protected and can be reproduced only by giving due courtesy to 'helabima'