Logo
2020 සැප්තැම්බර් මස 29 වැනි අඟහරුවාදා

සමස්ත ලංකා බෞද්ධ මහා සම්මේලනයේ 14 වැනි බෞද්ධ සාහිත්‍ය උත්සවයට අග්‍රාමාත්‍යතුමා එක්වෙයි!





සමස්ත ලංකා බෞද්ධ මහා සම්මේලනය 14 වැනි වරටත් සංවිධානය කළ බෞද්ධ සාහිත්‍ය උත්සවය සඳහා ඊයේ (15-09) දින ගරු අග්‍රාමාත්‍ය මහින්ද රාජපක්ෂ මහතා එක්විය.

බුද්ධ ශාසන, ආගමික හා සංස්කෘතික කටයුතු අමාත්‍යංශය හා එක්ව සංවිධානය කළ, මෙම බෞද්ධ සාහිත්‍ය උත්සවය කොළඹ 07, බෞද්ධ සම්මේලන ශාලාවේ දී පැවැත්විණි.

පරිවර්තන, පර්යේෂණ, නව ප්‍රබන්ධ, ගී කාව්‍ය නිර්මාණ, ශාස්ත්‍රීය පරිවර්තන, ළමා සාහිත්‍ය, ජනශ්‍රැති පර්යේෂණ ඇතුළු බෞද්ධ සාහිත්‍ය ඔපවත් කරන කෘතීන් උදෙසා මෙහිදී අග්‍රාමාත්‍යතුමා අතින් සම්මාන හා ත්‍යාග ප්‍රදානය කෙරිණි.

බෞද්ධ මහා සම්මේලනයේ හිටපු ජ්‍යේෂ්ඨ සභාපති, මහාචාර්ය ගුණපාල මලලසේකර, බිතු සිතුවම් ශිල්පී සෝලියස් මෙන්දිස් සහ බ්‍රහ්මචාරී වලිසිංහ හරිස්චන්ද්‍ර මැතිතුමන්ලා සිහිපත් කරමින් මෙහිදී විශේෂ ගුණානුස්මරණ සම්මාන ප්‍රදානයක් ද සිදු විය.

ජ්‍යේෂ්ඨ මහාචාර්යවරුන් වන සුනිල් ආරියරත්න, මහින්ද සෝමතිලක, මහාචාර්ය අසංක තිලකරත්න, ආචාර්ය මාලිනී ඩයස්, විශාරද නන්දා මාලිනී ඇතුළු මහත්ම මහත්මීන් රැසක් සම්මානයට පාත්‍ර වූහ.

මෙම අවස්ථාවට අමරපුර ශ්‍රී ධර්මරක්ෂිත නිකායේ ශ්‍රී ධර්මරක්ෂිතවංශාලංකාර රාජකීය පණ්ඩිත ශාස්ත්‍රපති අති පූජ්‍ය තිරිකුණාමලයේ ආනන්ද මහානායක ස්වාමීන්වහන්සේ, අති පූජ්‍ය විද්‍යා චක්‍රවර්තී ශාස්ත්‍රපති පූජ්‍ය එල්ලාවල මේධානන්ද නායක ස්වාමීන්වහන්සේ, කොළඹ විද්‍යෝදය පරිවේණාධිපති රාජකීය පණ්ඩිත දර්ශනපති අතිපූජ්‍ය බලංගොඩ සෝභිත නායක ස්වාමීන්වහන්සේ ඇතුළු මහා සංඝරත්නය ප්‍රමුඛ, රාජ්‍ය අමාත්‍යවරුන් වන විදුර වික්‍රමනායක, සරත් වීරසේකර, සමස්ත ලංකා බෞද්ධ මහා සම්මේලනයේ සභාපති ජගත් සුමතිපාල මහත්වරු ඇතුළු සම්භාවනීය අමුත්තන් රැසක් එක්ව සිටියහ.






Helabima. All rights Reserved.

Copyrights protected: All the content on this website is copyright protected and can be reproduced only by giving due courtesy to 'helabima'